*Die SABC is tans besig met die oorskakeling na die nuwe Hoë Definisie uitsaaistandaard (HDTV). HDTV is internasionaal reeds die afgelope tyd die standaard waaraan alle programme moet voldoen. Geen program wat nie teen ‘n spesifieke vasgestelde standard afgeneem is nie, kan vir uitsending aanvaar word nie. Daarom het Kerugma spesifieke kameratoerusting benodig voor ons hierdie keer die toer kon afneem. Die Here het in enkele van sy kinders se harte die begeerte gewerk om daarvoor te help bydra. Sodoende het ‘n klein persentasie van dit wat ons benodig, reeds ingekom. Omdat die Here op die wyse reeds begin voorsien het en ons nie sonder die nodige  apparaat op die toer kon gaan nie, het ons in ‘n geloofstap tydelike maatreels getref om die mees basiese van hierdie apparaat aan te skaf. Die belangrikste was twee kameras wat ons op die ou end in der haas bestel het. Ons is die Here so dankbaar dat dit betyds hier aangekom het! Dank Hom saam met ons daarvoor. Ons sal dit natuurlik verder ook baie waardeer as u ernstig saam met ons sal bid dat die Here vir ons verder sal voorsien sodat ons dit alles kan afbetaal. Ons maak baie staat op u gebede daarvoor. 

 * Bid asseblief dat al hierdie apparaat goed sal werk en veilig saam met ons sonder oponthoud in Israel sal aankom. Dat die Here sy hand op dit alles sal hou en ons instaat sal stel om dit reg te kan hanteer. Die kameras werk op ‘n heel nuwe konsep wat vir ons vreemd is en ons het dit nou maar pas ontvang. Dus is daar geen tyd vir enige opleiding of om dit te leer ken of om vertroud te raak daarmee nie. Ons vertrou om tydens die vlug soveel as moontlik van die handboek daarvan te bestudeer.

 * Bid asseblief vir ons vir toestemming om af te neem: By sommige plekke moet ons vooraf reël om te kan afneem en telkens is daar duur fooie te betaal. Dan is daar weer plekke waar daar altyd afgeneem mag word, maar op die mees onwaarskynlikste tyd besluit iemand net skielik dat daar nou nie meer afgeneem mag word nie. By verskillende van die plekke is dit baie moeilik om te weet wat om te verwag en moet ‘n mens per geleentheid bid en sien hoe jy te werk moet gaan.

 * So is daar onder andere die volgende waarvoor u vir ons gereeld gedurende die duur van die toer kan bid:
    - Bid asseblief vir ons vir toestemming by al die plekke waar ons moet afneem. 
    - Vir Randall, vir sy aanbieding, die leiding van die toer en vir sy gesondheid.
    - Vir Naas en Marina, vir krag en stamina om die kameras met tripote en ander apparaat vinnig saam te kan dra en betyds die regte plekke te kan kies om dit op te stel.
     - Vir die veiligheid, gesondheid en beskerming van almal op die toer.
 * Soos ons gesê het, beplan ons om ‘n paar dae na die toer verskillende plekke weer te besoek om dit vollediger te kan afneem. Bid asseblief vir ons vir wysheid om reg te kan oordeel wat die belangrikste is om te besoek en af te neem in die beperkte tyd tot ons beskikking asook vir ons veiligheid.

Ons waardeer u belangstelling en betrokkenheid by hierdie bediening en steun regtig gedurende hierdie toer baie op u gebede.